Chale Ho Aag k Dariya ko Paar Karne To

Chale Ho Aag k Dariya ko Paar Karne To 
Kaheen Jo Rok Liya Raah Mein Bhanwar Ne To? 

Thakan Jo Jism ki Hoti Utaar Bhi Letay 
Tamaam Rooh Thaka Di Hai Is Safar Ne To 

Nahi Pasand Nayi Konpalon ko Saath In ka 
Udaas kar diya Patton ko Is Khabar Ne To 

Magar Kaheen koi Qous-e-Kuzah Nahi Ubhra 
Khala Mein Rang Bhare Thay Kayi Nazar Ne To 

Koi To Shakal Nazar Aayi Phir Khayaalon Mein 
Sukoot-e-Shab Mein Koi Aaya Baat Karne To 

Isi Liye Mein Usey Bad-Dua Nahi Deta 
Dua ki Baat Agar Maan Li Asar Ne To? 

Mein Khaar-o-Khas Se Ubhar kar Urooj tak Pohncha 
Ajab Kamaal Kar Diya Hai Ik Sharar Ne To