Jo Sach Poocho Mere Yaaro Guzaara Karne Wala Hoon

Jo Sach Poocho Mere Yaaro Guzaara Karne Wala Hoon 
Main To TU TU Aur Mein Mein Ko Hamaara Karne Wala Hoon 

Teri In Hairti Aankhon Mein Jo Reh Reh K Chamakta Hai 
Main Us Paani K Qatray Ko Sitaara Karne Wala Hoon 

Tujhe Aqli Dalaael Se Main Saabit Kar Nahi Paaya 
So Ab Dil Se Wohi Koshish Dobaara Karne Wala Hoon 

Mujhe Soz-o-Gedaaz-e-Ishq Ki Tafseel Likhni Hai 
Main Ab Shauq-e-Tammana Ko Sahaara Karne Wala Hoon 

Haqeeqat K Safar Mein Jo Hamesha Saath Rehti Hai 
Main Us Hairat Ki Hairat Ka Nazaara Karne Wala Hoon 

Khayaal-e-Yaar Ki Chaadar Safar Aasaan Karti Hai 
Main Us Baabat Musafir Ko Ishaara Karne Wala Hoon 

Sabab Nakaam Rehnay Ka Munaafa Hi Munaafa Hai 
So Apni Jeet Ki Khaatir Khasaara Karne Wala Hoon 

Mujhe Khalid Shaoor-o-Aagahi Se Khauf Aata Hai 
Main Us Wehshat K Dariya Se Kinaara Karne Wala Hoon